Munaroh cari Jodoh

Hmmm…ada nyang lagi mendung bin bingung neh di Kampong Jengkol, siapa gerangan? Nyang jelas bukan Pak RT, karena baru dapat proyek dari pemerinte. Bukan juga si Asep nan keren, karena baru dapat kiriman amplop kemaren. Kalo lo kira si Enol darahtinggi, salah lagi, karena lagi nikmatin infotemen nyang penuh sensasi, selalu nampang buat publikasi, biarpun gosip murahan kagak peduli…fiewh, dasar artis asal jadi. Apa Jenab ya? Kalo nebak Jenab pas warungnya kagak libur mah, udah pasti salah, kagak ada kamus mendung selama bisa ngembat baxo segunung..ck..ck..ck. Trus, apa si Oyen? Jangan salah, Oyen kagak pernah mendung, apalagi nyang bisa bikin mendung coba, udah mah manis, eksotis, keren abis, modis, kagak narsis, …hmmm…pantesan dolo babe bangga banget sama ni anak gadis (WARNING : DILARANG PROTESS!!!)…

Oow…ternyata Munaroh nyang lagi mendung. Kagak biasanya Munaroh mendung.  Sekalipun sering diledekin luar biasa sama Jenab dan Oyen, dia kagak pernah mendung. Sekalipun sering direpotin sama anak-anak TPA se emak-emaknya, dia juga kagak mendung. Biarpun makan sebakul bertiga, dia juga anti mendung, so wat hepen? Aya naon? Ono opo to? Kenape tuh anak?…ternyata eh ternyata, Munaroh  langsung dapat ultimatum dari Nyak dan Babenye, tanpa lewat identity dan supremacy. Kemaren Munaroh dapat ultimatum mo dicariin jodoh ma Nyak dan Babenye

Lah, dicariin jodoh kenapa mendung ya, bukannya untung, Jenab ma Oyen ajah kagak pernah dicariin. Soalnya kate Nyak ma Babenye, bakalan ngejodohin Munaroh sama anaknya juragan Pete dari kampong Pete, cuman gara-gara bakal calon orang kaye, yang nurutnye bakal ngejamin idup anaknye. Ya begini neh kalo cuman mikirin dunie, kagak ngutamain nyang bisa ngebimbing akhiratnye, entu nyang bikin Munaroh mendung bin bingung dan terkatung-katung, aduuhhh…biyuuuung….

Akhirnya Munaroh bilang noh ke Nyak ma Babenye, kalo Munaroh cuman bakal nerima kalo tuh orang baik agamanye, kagak cuman calon orang kaye. Giliran digituin, Munaroh dapet ultimatum yang kedua neh, kata Babenye….

“Ya udah, kalo lo kagak mau, lo cari sendiri sono, tapi buruan yak, kalo bisa tahun ini juga, biar Nyak sama Babe tenang lo udah ada nyang ngejagain”

Wedew…bikin Munaroh gak cuman mendung, tapi udah kelabu dan mau turun badai puting beliung, pengen rasanya nangis meraung-raung, untung masih inget Gusti Allah nyang Maha Pelindung, kagak bakal biarin hambaNya dirundung perasaan pilu tak berujung.

Denger sohibnya kebingungan Jenab nyang kagak kenapa-kenapa juga jadi ikutan sok bingung, akhirnya ngehubungin Oyen buat cariin jalan keluarnya.

“Waduh gimana neh, apa kita bikin lowongan aja, trus di tempel kemana-mana, DICARI! JODOH BUAT MUNAROH!…BUAT JENAB SEKALIAN, DIJAMIN LEBIH GEDE!, lo sekalian gak Yen?”….gini neh usul gak mutu orang paling gak mutu se Kampong Jengkol…beuhhhh…

“Aaaaahhh…kagak pake, emang lo kate cari kerjaan” Kata Oyen sewot

“Cari jodoh juga harus sesuai syariah, jangan asal ajah, Lo mao dapat calon nyang gak amanah? Ngejalanin agama setengah-setengah, bisa-bisa jadi keluarga nyang kagak sakinah, gimana bisa dapet barokah…beuhhh…parah”  kata Oyen lagi, masih sewot lah.  Jenab cuman cengar-cengir sok kebanyakan tingkah, ampun dah.

Akhirnya, Oyen ma Jenab ngehubungin teh Dingding Badingding untuk bantuin Munaroh. Melalui perantaranya, dimulailah pencarian sesuai kriteria. Ada nyang anak Pak Lurah, Ustad kampong sebelah, aktipis jamaah dakwah, guru madrasah, wartawan majalah, sampe calon kepala daerah…..Wah, bikin Oyen terperangah, Jenab juga geleng-geleng tak tentu arah…

Akhirnya teh Dingding menyampaikan ke Munaroh, hasil penyelidikan dan pencariannya selama berbulan-bulan, berharap ada nyang berkenan, lalu dipanggilah Munaroh untuk minta persetujuan,

“Gimana Roh, ada nyang pas kagak? Entar aye prosesin kalo ada nyang cocok” kata Teh Dingding suatu ketika. Denger begitu, Munaroh masih diaaaam saja.

“Masak, sebanyak ini kagak ada nyang cocok, emang Lo mau yang kayak gimana?” Lagi-lagi Munaroh diam seribu bahasa dan seratus kata-kata.

“Kalo lo udah siap berumahtangga, Lo harus siap nerima suami Lo apa adanya, nyang penting sama-sama berusaha buat ngejalanin syariahNya, ngerti kan?” Munaroh ngangguk-ngangguk sambil nelen ludah nyang kering kerontang, karena udah ketelen semua.

“Tapi ngomong-ngomong, Lo udah siap kan?”, kali ini Munaroh meringis denger pertanyaan barusan…

“Entu die masalahnye Teh, aye bingung bukan nyari calonnya, tapi karena udah diburu babe, padahal pan belon siap….mangap” Kata Munaroh sambil nyengir kuda, bikin Teh Dingding melongo kuadrat mpe laler hamper menclok ke mulutnye, untung Munaroh sigap menghalau tuh laler, walaupun samperan tangannya nemplok ke mulut…..PLAK *sensor*

About these ads