Jatoh Cintrong

Hmmm….si Oyin akhir-akhir ini ceria mulu neeh. Semua disenyumin, termasuk seluruh anggota Peterpan nyang lagi makan nasi basi di kandang, padahal kemaren abis berantem sama si Ariel gara-gara kekalahan MU nyang tragis dan miris. Dia juga kagak males-malesan lagi mandiin si Sinta ma Santi di empang saban hari, biasanya Sinta ma Santi dimandiin seminggu sekali kalo lagi inget dan lagi mau. Mpe kebo nyang lain kagak mau deket ma Sinta dan Santi, karena konon kata kebo nyang lain mereka bedua lebih bauk, mangkanye kagak ada satupun kebo nyang pengen ngelamar tuh 2 kebonya Oyin, jadi mpe sekarang masi singel, jomblo dan perawan ting-ting. Ade nyang minat?..huehehhe..

Oyen curiga neh, mesti ada apa-apa sama anak nyang atu ini. Dan kemungkinannya cuman atu, Oyin lagi paling in lop, alias jatuh cintrong. Akhirnya untuk memastikan, Oyen ngintrogasi tuh anak waktu maen di warung baksonya Jenab,

“Lo jatuh cintrong ma sapa Yin, kok jadi mangkin gile gini” si Oyin masih pringas-pringis, persis penghuni RLJ eh RSJ (mangap Bundo…  )

“Ihhh…kok Encing Oyen tauk Oyin lagi jatuh cintrong…xixixixi…” wedew tambah parah ne centilnye.

“Ahhh….Oyin tauk, pasti dulu Encing juga kek gini pan, xixixixixi…jadi semangkin ramah, sumringah dan merekahhhh rrruaahhh…..” fiewwhhh, kambuh dah lebaynya.

Iye, Oyen jadi keingetan dulu awal-awal kenal sama nyang namanya jatuh cintrong. Tapi kagak kek si Oyin ini. Dulu mah Oyen diem-diem aja dah, cuman demen ngeliat dari jauh dowang, kagak berani nyapa apalagi ngobrol segala. Eeehhh…giliran si Die senyum ma Oyen, jantung Oyen serasa ilang dari peredaran, kagak bunyi “degup…degup…degup” getuuu, tapi udah, “jedog…jedog…jedog”, beuhhhh…..Kata Encang Ucup entu namanye cinte monyyetttt, entar juga ilang ndiri kalo udah kagak jadi monyet lagi, udah gorilla..hi..hi..hi

“Mendingan si Oyin dibikin jatuh cintrong terus Yen, biar semangat getuuu, tadi aja gesit banget bantuin aye ngembat bakso, pan lumayan, jadi mangkin rajin dan kagak suka ngomel lagi kalo dibilangin” Jiah, ngerasa punya pendukung tuh si Jenab, beuuhh sama ajah.

Oyen bilangin tuh ke Jenab, kalo cinte ma orang belon tentu dapet balesan setimpal. Pikiran kita abis buat mikirin die, gak dijamin juga dienya mikirin kite. Ujung-ujungnye semua yang kita lakuin demi die, jadi salah pan niatnye, alamat kagak dapet pahale.

“Alaaahhh…..ketauan cinte lo dolo bertepuk sebelah kaki, iye paannnn…wkwkwkw” beuhhh, kentjeng bener Jenab kalo lagi ngetawain Oyen, nyebelin.

Tiba-tiba datang Oyin makbeduduk nyamper lagi ke warung, setelah sempat ngacir beberapa saat nyang lalu. Tapi kali ini beda nian, tampangnya udah lebih semrawut dan kasak-kusuk dibanding nyang tadi, beuhhh….jangan…jangan….

“Whoaaaa….si Maman ude punya cewwweekkkkk, dan lebih cakkep dari Oyiiin, Oyinnn kagak terimaa….. Encing Jenaaaab, Oyin minta baksoooo, kalo kagak Oyin gak mau bantuin ngembat bakso lageee….” tereak Oyin sambil mewek-mewek kek orang sebulan kagak boker.

Hmmm, baru percaya deh Jenab, kalo orang salah nempatin jatuh cintrong kek gini jadinya. Ini masih mending, ada juga noh nyang akhirnya ilang semangat, males mandi, males mikir, mabok, mpe ada nyang nekad bunuh diri. Hmmmm…Manusia…manusia…, kambing aje jatuh cinte kagak segitunye, kalo ditolak ma Kebo ya udah nyari kambing nyang lain (emang iye ye???  ).

“Mangkanye Yin, kalo pengajian dengerin tuh kata Teh Dingding, cinte sama manusie kagak ada untungnye kalo kagak didasarin cinte sama Allah. Ketauan kalo pengajian cuman mikirin si Maman….beuhhh” kata Oyen sewot.

“Iye, Oyin sebel sama si Maman, Oyin kurang apa coba, tampang kagak jelek-jelek amat, kagak miskin-miskin amat juga, otak rada-rada pinter juga, kenapa Maman milih si Juleha coba, katakan Ncing, apa kurangnya Oyin” lah, belagak akting kek si Ijah lage.

“Cuman atu Yin, lo kurang waras…beuhhh. Udah deh, lupain no si Maman, masih banyak nyang lain nyang lebih penting nyang musti dipikirin, idup cuman sekali, bikin nyang manfaat dong Yin”, emang susseehh mbilangin sepupu nyang atu ini, beuhhhh.

Tak berapa lama, denger-denger si Oyin kagak mikirin si Maman lagi. Udah balik normal lagi dan gak aneh kek kemaren-kemaren lagi. Malesnya juga udah ilang, malahan semangkin rajin. Oyen jadi pengen liat si Oyin nyang udah mangkin sadar ini, dan di suatu pagi saat si Ariel bunyi, …keokeokeok…keokeokeok…

“Cieeee…rajin bener, getu donk, jangan manyun mulu kek kemaren” sapa Oyen suatu pagi.

“Iye, Oyin kagak mikirin si Maman lagi. Kemaren Oyin kenalan ma anak baru, lebih keren dari si Maman”…..gubraaakkkkkk….