Asyiknya Genetika

“Apa sih yen, asiknya belajar genetika? bukannya susah yak? Gue aja nyang belajar uler tangga pake petak halma kagak ngarti-ngarti” Tanya Munaroh pada suatu masa.

“Ilmu Genetika tuh intinya ilmu perbaikan keturunan getuu, kita dikasih tau apa aja sih nyang ngatur sifat-sifat tanaman atau hewan ntu, jadi kita belajar tentang sistem pewarisan sifat di dalam makhluk hidup, getuuu” Kata Oyen dengan bahasa setinggi langit, nyang mpe sekarang belum nemu kamus buat nterjemahin ke bahasa nyang gampang di ngertiiin ma orang kek Munaroh ma Jenab.

“Mangkanya Oyen ntu kerjaannya milih bapak ibu tanaman mana nyang harus dikawinin biar anaknya bener, kayak kalo pengen anak nyang buahnya banyak dan rasanya manis, nah berarti cari orang tua nyang bapaknya buahnya banyak trus ibunya rasanya manis, getuuu gampangna mah” Lanjut Oyen dengan bahasa agak nyungsep dikit ke bawah.

“Ooo…getu ya Yen, berarti kalo gue mo dapet anak nyang gak gaptek, bapaknya musti gak gaptek juga yah, terus Jenab juga ntu, karena dia doyan makan, mangkanya kalo bisa bapaknya nyang gak doyan makan, biar gak sama-sama ngabisin jatah. Gue takutnya kalo dua-duanya doyan makan, trus anaknya doyan makan juga, waduh…bisa abis ntu gerobag baxo” Jenab nyang denger Ocehan Munaroh kepala sebelah kirinya ngangguk-ngangguk aja tanda kurang setuju dikit.

“Yah kata gue sih, kurangin ntu porsi makannya, calon suami lo kagak bakalan mau ma lo kalo porsi makan lo kagak berubah, karena lo bakal nyedot hamper 100 persen gaji dia sebulan, trus anak lo mo dikasih makan apa ?!!” Jenab nyang denger ocehan Oyen jadi narik lagi anggukannya, tanda kagak jadi kurang setuju banyak.

Oyen juga cerita, dulu kagak ngarti juga kenape kuliah ngambil entu jurusan. Dulu mah pokokna kuliah, malu ma temen SMA, apalagi ma gebetan Oyen, kalo Oyen kagak kuliah. Padahal ma Babe dulu kagak setuju Oyen kuliah, mahal katanyah. Disuruhnya di IAIN ajah di kampong, karena murah. Tapi dulu mah Oyen ogah, karena IAIN musti pake kudung, baju panjang, pake bahasa arab lagi…Oyen kagak mauuu…pfffh. Oyen ngeyel de entu ma Babenye, pokokna Oyen mau kuliah. Titik. Kagak peduli Babenye bisa bayarin pa kagak, Oyen ngambek kalo kagak kuliah (pan dari dulu Oyen hobinya ngambek, mpe bikin Nyaknya suka ngasih makan rheumason ke mulut Oyen kalo ngambeknya dah parah, pantesan pas gedenya tuh bibir sensual banget kayak Angelina Jolie….he…he…..nyang kagak setuju gak usah protes, muntah aja !!).

Awal-awal agak nyesel juga ngambil entu jurusan, udah mah sussssah, trus kayak gak da gunanya juga buat ncari kerja. Tapi kata Ncing Maemunah bin Munahmae, kakak kostan Oyen nyang blasteran Tegal-Brebes,

“Biar gampang nyantel entu pelajaran musti ikhlas dulu Yen. Lo ikhlas belajar entu ilmu, en yakin Allah entu naro Oyen di entu jurusan, pasti ada mangsudnye, sapa tahu ntar jadi jalan buat Oyen untuk jadi ahli genetika nyang mendunia”….he…iya juga seh.

Denger cerita Oyen, sekarang Munaroh juga yakin buat terus belajar ngaji dan ngajarin anak-anak TPA, sapa tahu dari tangannya kelak dia bakalan ncetak murid-murid nyang hafidz Qur’an, jenis orang-orang nyang paling ditakutin ma Yahudi. Jenab juga mo belajar resep baxo babenye, biar ntar bisa nerusin usaha babenye, sapa tauk ntar nemu resep baxo rasa jengkol, pete, terasi, cabe dll….trus kalo baxonya tambah enak pan banyak nyang suka dan bisa buka cabang dimana-mana. Ntar baxo Jenab bakalan terkenal di dunia…he…Yah Nab, asal porsinya kagak lo sedot mulu aja.

“Kalo Oyen pengen calon yang kayak apa Yen? Biar anaknya tambah mantep”  Tanya Jenab dengan tampang sok penasarannya kayak pemaen sinetrong lagi kambuh akting ancurnya.

“Oyen kagak pengen nyang gimana-gimana, nyang penting mau belajar jadi imam nyang baik buat keluarga dan bertanggung jawab, …….kalo bisa seh plus cakep, kaya, pinter, kagak gaptek, warisannya buanyak…he..he..” Kata Oyen kepedean

“Halah…maruk lo Yen, lagian kalo ada juga….kagak mao ma Lo….ha…ha…” Inilah ketawanya Munaroh ma Jenab paling kentjeng of the week…beuhhh