17 an di Kampong Jengkol

Bulan Agustus katenye bulan istimewe di Kampong Jengkol, walaupun nyang ultah kampong sebelah, tapi Kampong Jengkol ternyate ikutan pada ngerayain. Emang ada kegiatan apa aje di Kampong Jengkol? Ya, gak beda lah sama Kampong laen. Kalo di Markas Komandan ada lomba puisi, di Kampong Koepoe Biroe ada karnaval aneh, maka di Kampong Jengkol juga ada banyak perlombaan. Neeee…..

1.      Lomba tebak bauk

Hah?! Gimana lombanye? Ini khusus buwat anak-anak. Jadi ada korban nyang dimasukin kamar pas, trus diliatin matanya dowang. Naahhh…nyang bisa nebak entu bauknya sapa, dia nyang menang! Dan ternyata kagak ada nyang menang, soalnya hampir seluruh warga pada bauk jengkol semuwah, kecuali Jenab nyang bauk bakso dan Oyin nyang bauk kebo (sayang tu dua orang aneh kagak ikutan, udah kelewat jaman)

2.      Lomba resep jengkol paling oke

Naahh…ini khusus buat emak-emak. Peserta dikasi modal seribu perak, gimana caranye bikin masakan dari jengkol nyang sehat, halal dan begizi, mengandung 4 sehat 5 sempurna. Ada nyang bikin jengkol mentah dikecapin, jus jengkol di garemin, jengkol cincang di sausin, mpe jengkol kukus di cabein. Ternyata nyang eneh juga kagak ada nyang menang, soalnya semuwa resep mbikin nyang nyicip di opname di kamar mandi .

3.      Lomba mirip Pak eR Te

Ini khusus buwat bapak-bapak. Dari juragan jengkol sampe penjaga tol, dari mantan lurah sampe guru sejarah, dari tukang sayur sampe penjual semur, dan dari pejabat sampe kaum melarat. Tapi lagi-lagi sayang, nasib mereka sama seperti para kontestan Koper Man Jengkol Nyus taon ini. Gak ada satupun nyang bisa dianggap mirip Pak eR Te. Emang, Pak eR Te kagak ada duanye .

4.      Lomba jalan sante

Ini buwat seluruh keluarge. Dari cicit sampe engkongnye, semua boleh ikutan, dan serba gratisan. Nyang eneh nyang menang sapa nyang jalannya paling sante, otomatis nyang paling belakang nyampenye. Dan lage-lage kagak ada nyang menang, karena nyang paling belakang Pak eR Te, dan khusus Pak eR Te diharamin ngambil hadiah .

5.      Jengkol Award 2010

Akhirnya nyang terakhir adalah Jengkol Award buwat seluruh warga nyang berperan untuk kemajuan Kampong Jengkol dan berperan untuk kepentingan seluruh warge. Silakan buwat sapa aje nyang pengen dapet awardnye diambil di mari. Kalo dalam waktu 1×24 detik gak kesini seluruh award akan diambil alih oleh Pak eR Te .

Waah…meriah bener ye. Tapi intinye kemerdekaan harus dan wajib diisi! Bukan sekedar diperingati dan dimeriahin. Semua siapapun kita, wajib dan kudu punya peran. Jangan sampe perjuangan nyang nguras keringet, airmata dan darah disia-siain begitu aja. Dan tentu aje, kemerdekaan adalah HAK segala kampong. Maka seharusnya kampong kita gak ngedukung kampong manapun nyang ngejajah kampong lain, baik fisik maupun non fisik!!!

Ayo! Buktikan kamu punya peran! Ayo! Sejahterakan Oyen!

About these ads