Tentang Emak-emak

Tentang lalaki udah, tentang anak-anak udah, tentang murid-murid juga udah. Hmmm…sekarang saatnya tentang emak-emak. Kalo ngomongin soal emak-emak mah banyaaaaak, selalu ada cerita sejak Oyen ngusel di perut sampe nongol segede gene. Konon katenye Oyen lair kalung usus, nyang dolo dukun beranaknya binun, dipertahanin bayinye apa ususnye. Beruntunglah Emak mempertahankan Oyen seutuh-utuhnye, katenye nangisnya lumayan bisa ngusir tikus nyang demen mejeng di kolong dipan.

Emak selalu sigap sejak ayam jago belon melek dan ngeluarin kokokan falesnye. Mbersihin ompol nyang bauk jengkol (jiaahhh…masih ingusan sangat udah bauk jengkol ), ngisiin neh perut pake ASI gratisan, nyang sehari semalam bisa ribuan kenyot. Mandiin pake sabun colek sisa cucian kemaren, dan nimang-nimang sambil nyanyi lagu OST Kampong Jengkol. Berhubung suaranya kek Krisdayanti kesedak pu’un jengkol, seketika bayi Oyen pules dan ngimpi jadi jus jengkol (kalo nyang minum Pak eR Te gak papalah ).

Tapi gak cuman entu. Emak juga ngurusin sederetan lalaki aneh hasil kerjasamanya ma Babe. Nyiapin seragam sekolah Ncang Oyon nyang seminggu udah penuh motip tapak kaki nggilani. Nyisirin rambut Ncang Ucup ala Bambang Gentolet dengan sedikit olesan minyak jelantah sisa nggoreng jengkol basi kemaren. Sambil kelak merencanakan buat ngelairin Encep dan Entong. Dan tak lupa nyiapin tas dan seperangkat alat kerja Babe sebelon berangkat kerja. Untunglah Oyen nangisnya cuman kalo laper dan pipis, belum bisa nangis sekalipun nonton pilem kek kuchek-kuchek hota he.

Setelah para lalaki melangkah pigi dengan sok pedenye, Emak bakalan sibuk goreng ikan asin dan ngrebus daun jengkol buat sarapan siang. Nyuci dan nyetrika baju setumpuk dengan mesin sepuluh jarinye. Belon lagi goreng dan mbungkusin kacang bawang buwat disetor ke warung-warung juragan jengkol, sambil nggendong bayi Oyen pastinya. Soalnya kalo ditinggal takut diangkut pemulung.

Entar kalo pada pulang Emak sibuk mberesin semuwa oleh-oleh. Ada nyang bawa pulang kaos kaki dekil, sepatu mangap karena main bola sambil jumpalitan, seragam bauk ciuman kebo, ato dengkul bauk amis dan pulang menye-menye abis rebutan layangan robek.

Dan entu belon berenti sampe Babe dan anak-anaknye bener-bener merem di dipan reot. Melek pertama dan merem terakhir. Nyuapin pertama dan makan terakhir. Dan nyang pasti direngekin pertama dan leyeh-leyeh terakhir, itupun kalo ada waktu buwat leyeh-leyeh. Nyang ada belon sempet leyeh-leyeh di bawah pu’un jengkol, Oyen udah tereak….”oweeeekkk….oweeeekkkkk……hoeeekkkkk….”

Sapa bilang jadi ibu rumah tangga gak seelit wanita karir? Sapa bilang jadi ibu rumah tangga gak perlu pinter? Siapa bilang jadi ibu rumah tangga entu gak luar biasa? Nyang jelas jadi ibu rumah tangga entu bisa jadi sarana mengantarkan kita ke surgaNya, selama ikhlas ngejalaninnya.

*Buat para ibu, dan para calon ibu, semoga bisa menjadi sosok pencetak generasi unggulan. Amin

About these ads