Keluarga musti Dijaga

Ngemeng-ngemeng, ada nyang aneh neh sama Pak’e dan Buk’e, kagak biasanya anteng kek patung Pak Sudirman di alun-alun. Trus pas kemaren Oyen mbikinin kopi Pak’e kok cuman diserot airnye, biasanya pan sama sendoknye, eh salah, biasanya pan sambil senyum sama anaknya wedok, trus mbilang ”Hmmm… kopinya manis kek anak wedok”, mbikin Oyen ikutan senyum, karena kagak tauk dibelakang ditambahin, ”Dan item kek anak wedok…xixixixixi”, beuhh… untung Oyen kagak denger dah.

Trus pas nonton TV bareng tumben Buk’e kagak ngerebut remotnya, biasanya pan kalo Pak’e nonton balap motor Buk’e sigap ngerayu wat mindahin sineteron idolanye ”SUAMI-SUAMI MUSTI SAYANG ISTRI SABAN HARI”. Eneh nontonnya aje jauh-jauhan, Pak’e di bawah TV, Buk’e di belakang TV, doh! Ada apa gerangan cintah…?!!!

Akhirnya Oyen nyewa detektip gak mutu Kampong Jengkol, sape lage kalo bukan si Jae. Mumun sementara lagi libur, ngurusin suami barunyah. Si Jae dan Oyen pun beraksi bak James Bono, detektif legendaris Kampong Jengkol nyang pernah ngungkap kasus pembunuhan kambing pas lebaran haji beberapa poloh taon nyang lalu.

Pertama Oyen ngumpulin data ma fakta, sejak kapan Pak’e dan Buk’e berubah? Trus ngewawancara tertutup di WC umum sama saksi mata dan saksi idung, sapa tauk pernah nyium gelagat mencurigakan, dan terakhir… ya nanyak Pak’e ma Buk’e langsung pastinyah (penonton : jiah, kenapa pake muter-muter dolo? Oyen : biar panjang ceritanyah, kek gak tauk leubaynya Oyen ajah, beuhh).

Dan berdasarkan data dan fakta yang berhasil terendus sama idung mancung Oyen, ternyata Pak’e berubah konon sejak burungnye demen muntah, gak demen berkicau lagi. Akhirnya Oyen ma Jae menginpestigasi entu burung, kenape sekarang demen muntah?

”Emang cara nginpestigasi entu burung pegimane Yen?” Inilah Jenab, detektip yang seringnya kagak tauk musti ngapain

”Ya kite cari tauk, barang apa nyang mbikin entu burung muntah, nyang jelas barang-barang nyang baru ada dirumah sejak gejala muntah terjadi, trus kite deketin entu barang ke burung, nahhh… jadi ketauan pan asal musababnya”

”Jangan-jangan entu burung ngidam Yen, cek urinnya aje Yen” hedeh, ngasal neh anak

”Pegimane bisa ngidam, burung perkututnye Pak’e cuman atu, emang selingkuh ma sape?!. Kagak mungkin ma burung tetangge, pan saban hari disangkarin ma Pak’e” kate Oyen yakin

”Iye ye, sama eLo kagak mungkin ya” beuh, sekali-kali ngomong mutu ngape

Akhirnya rencana Oyen pun dijalankan, entu burung dicekokin ma barang-barang nyang kira-kira mbikin die muntah, dan ternyate… entu burung alergi sama bauk pu’un jengkol nyang ditanam Buk’e di pekarangan depan rumah. Akhirnya Oyen pun minta Buk’e wat nyingkirin entu taneman di belakang rumah biar burungnya Pak’e gak muntah-muntah lage, nyang mbikin Pak’e uring-uringan. Dan alhamdulillah setelah beberapa hari, entu burung akhirnye kagak muntah-muntah lage.

Tapi ternyate sodara-sodara, Pak’e ma Buk’e masih terlibat perang dingin, gak pernah perang panas lage. Hedeh, akhirnye rencana kedua pun dijalankan. Ditanyalah para orang-orang terdekat Pak’e dan Buk’e. Konon kate si Pak Dhe, Pak’e akhir-akhir eneh demen berendem di kolam renangnye Emak, wat ngilangin bauk menu jengkol bikinan Buk’e nyang asepnya demen nempel di badan kagak ilang-ilang. Trus konon kate Kakek, Buk’e pengen ditraining gimane caranye masak dan makan jengkol, tapi gak bauk jengkol, karena konon Pak’e jadi alergi deket sama Buk’e karena bauk jengkol nyang menyengat. Ouw..ouw.. akhirnya ketemu sudah jawabannya…

Kini saatnya Oyen menjalin persatuan dan kesatuan kek TVRI, eh mendamaikan Pak’e dan Buk’e mangsudnyah. Oyen akhirnya mau dimasakin apa aje, asalkan disediakan kecap, saus, ma bumbu tabur rasa jengkol, jadi Buk’e kagak perlu masak jengkol lagi dan Oyen tetep bisa makan apa ajah tapi dengan rasa jengkol sekalipun ala kadarnyah. Atribut khas jengkol pun dari pajangan, poster, lukisan, dan apapun nyang ada isi jengkolnya sekarang cuman nangkring di kamar Oyen. Akhirnya Pak’e dan Buk’e pun lengket lage, dan mangkin sayang sama anak wedok nyang tjakep eneh, karena udah mbikin semuanya jadi aman terkendali, kagak lagi terlibat konfrontasi dan beradu argumentasi, dan masing-masing ngerasa bener sendiri, Doh! Jangan sampe dah, gara-gara jengkol rumah tangga jadi jebol, ape kate Pak Re Te?!!!

Yah, Oyen jadi semangkin ngarti dah, kadang masalah sepele bisa memicu disintegrasi keluarga. Ituh mangkanya masing-masing harus punyak komitmen kuat untuk saling ngejaga ikatan suci entu. Komunikasi entu perlu, kadang juga musti saling ngalah, kalo masing-masing ngerasa bener sendiri seh ya kagak pernah nyatu akhirnya. Karena satu hal nyang musti diyakini, setiap masalah entu punyak solusi, kalo kite kagak nyerah dan mau usaha nyari. Begetu ye… hikmahnya jengkol itu… eh…keluarga itu musti dijaga, karena surga dunia entu keluarga yang penuh cinta… xixixixi…

***

Jenab : “Jangan ampe ketok palu cerai Yen, soalnyah eLo bakalan telantar, karena gak ada satupun nyang minat ngebawa eLo…”

Oyen : “Apalage elooooo………….. Berattttttttttttttttttttt…

Posting paling bau ini pastinya saya ikutkan dalam kontes kecubung tiga warna BlogCamp. Ini adalah bagian akhir dari tiga tulisan “Mencari Jalan Terbaik“. Nyang pertama dibikin Pak’e dalam episode “Jengkol Bikin Dongkol” dan nyang kedua dibikin Buk’e dalam episode “Anak Semata Wayang“