Balada Oyen Junior

Sekarang Oyen udah emak-emak, walopun mukanya masih kek bocah ingusan, sangking uimutnyaa. Sejak ngerencanain jadi emak-emak standar SSI (Standar Syariat Islam), Oyen udah nyiapin bekal sejak jaman lalu. Dari buku karangan Semail Marjuki sampe karangan Mbah Maimun (keknya bukan pengarang buku dah ), udah dilahap dan dikunyah ampe muntah. Tapi dasar di kampong  jengkol masih banyak orang udik daripada nyang terdidik, seringnya syariat kalah ama adat. Liat aja noh Mak Lemper bilang ke Oyen, konon kate leluhur berdasar kitab Undang-Undang Hukum Adat, bayi setelah lair wajib diserutup embun-embunnye, trus di selametin saban 40 hari, biar cepet jadi pejabat konon dikasi nasi nyang dikunyah pake pisang kelutuk (emang bayi macan ape?!!!).

“Trus elo mbilang ape Yen ame Mak Lemper..?” tanye si Munaroh nyang juga ngikutin jejak Oyen, nyiapin bayinye biar taat syariat.

“Karena kite uda punya syariat nyang hukumnya mbikin maslahat, makanye Oyen cuman ngikutin syariat. Abis lair yang penting diadzanin, di akikahin, dikasi nama nyang bener, di kasi ASI aje, jangan dikasi susu sapi, biar anak Lo manusiawi kagak sapi’i ?!!” Munaroh manggut-manggut sambil kentut

“Tapi nyang lebih super puentinggg… setelah entu didik nyang bener, biar kagak keblingerrrr” kate Oyen gemeterrr  sambil ngelap iler

“kek nyang duduk ndlosor di parlemen Re Te entu ya Yen?”

“Ah, mereka mah kagak keblingerrr, cuman gak bisa dengerrrrr !!!” tereak Oyen mbikin si Oyen junior mangap-mangap berasa pengen ngomong ‘hancurkan hukum adat, tegakkan syariat!’, trus ngusel-ngusel di ketek Oyen.

Udeh ye… Oyen junior mo ngenyot dolo… *sencorrrr*

Advertisement