Pajak nyang di acak-acak

Jenab sekarang naik pangkat. Kagak lagi jadi tukang belanja ma tukang angkut tabung gas 15 kg, tapi udah jadi setap administrasi di kios baxo babenye. Bukannye ape-ape, babenye ngangkat tuh anak biar bisa lebih sibuk dari sebelumnye, biar kagak ada kesempatan ngembat baxo mulu. Lagian biar tu anak tauk, kalo tuh kios baxo untungnye kagak seberape, jadi pan Jenab bisa sadar diri, kagak aktip dan semangat ngembat baxo lage. Kini Jenab mangkalnye di ruang kasir dan tiap akhir bulan musti ngitung Ape BBB (Anggaran Pendapatan dan Belanje Bulanan Babenye).

Benarlah apa yang diramal babenye, Jenab melotot tuh mata ma bibir begitu ngitung anggaran pengeluaran hidup sebulan penuh, tetep sambil nelen baxo planet sisa kemaren.

“Buseet Beh, ni pengeluaran pajak banyak amat, kagak salah catat?!” Selidik Jenab begitu ngelihat daptar berikut ini,

1. Pajak rumah sama tanah
2. Pajak motor se SIM, STNK ma helmnya
3. Pajak kios baxo dan cukai baxo
4. Pajak jalan kampong
5. Pajak keamanan
6. Pajak kebersihan
7. Pajak jualan
8. Pajak lain-lain
9. Hal-hal yang belum diatur diatas akan ditambahkan setelahnya…

“Keknya cuman nyedot udara ma buang angin doang yang kagak dipajakin” heuheu…tumben bener lo Nab.

“Babe kuatir Nab, takut-takut kalo ngembat baxo juga dipajakin, udah ma baxo Babe ngilang, suruh bayar lage, apa kagak rugi berkali lipat entu” Jenab tambah manyun serasa kesindir.

“Iye…Jenab kagak bakalan ngembat lagi, kalo inget!” Bales Jenab sambil ngacir ke tempat Oyen nyang manis.

Ternyata si Oyen juga lage ngetung pengeluaran akhir bulan, berharap ada sisa anggaran, pan lumayan buat jajan, kalo bisa juga buat bantu teman, ato buat nambah simpenan, ehem….tuk modal masa depan. Ternyata itungan Oyen kagak jauh beda sama itungannya Jenab, teuteup banyak yang musti dipajakin. Jenab jadi pengen tahu, tuh duit pajak kemane aje yah, perasaan kalo diitung-itung dari segunung nyang dipajakin harusnye pan banyak duitnye, cukup buat bikin warga sejahtere, tapi keknye gak segitunye.

Liat aja, jalan masih banyak kerikil ma lobangnya, nyang suka bikin kejeglong nyang pada lewat. “Si Manis Jembatan Jengkol” aja pernah kejeglong, kata Jenab die pernah denger rintihannya pas malam Jumat kliwon. Karena ngebayangin Si Manis nyang kejeglong, nyang pada lewat di ditu malah ikut ngetawain, padahal niatnya Si Manis pan buat nakutin. Si Manis kagak tahu apa, biar udik, warga Kampong Jengkol masih banyak nyang gak demen sirik dan cerita macem dedemit, kalopun ada yang lari ngibrit, itu bukan karena takut, cuman sedikit kalut.

Empang nyang makin nyusut juga belon tuntas di bikin patut. Nyang bikin Sinta ma Santi (sepasang kebonya Oyin) kagak jengah berendem. Berobat juga tetep susah. Kalo gak punya duit ngurus suratnya muter-muter, ngantrinya puanjang, nunggunya di emperan rumah sakit, dokter yang ngelayanin juga entar-entar ajah…beuhh bikin sakitnya tambah parah. Sekolah juga sama ajah, udah mah gedungnya ala kadarnya, fasilitas sekedarnya, akhirnya belajar juga gak maksimal hasilnya. Boro-boro status SBI, SBN, SBRT, disamakan, terdaftar, malahan diakui juga belon temtu.

Dan setelah cek dan ricek, ternyata APBKJ (Anggaran Penapatan dan Belanja Kampong Jengkol) 70% dari pajak…busyeeet. Jadi selama ini tuh duit nyang dipake pemerinte hampir semue dari kite, tapi anehnya gak pernah ngerasa butuh kite, malah kite dianggep beban derite. Mangkanya subsidi minyak ilang, subsidi pupuk ilang, subsidi pendidikan, kesehatan, listrik, pangan, gas, dll juga turun. Tapi anggaran gak penting malah naik, benerin gedong wakil rakyat, benerin lapangan, nambah fasilitas dan tunjangan yang gak cukup sejuta dua juta, tapi ratusan juta…ck..ck..ck. 70% pajak dari total pendapatan harusnye dibalikin ke warga, bukan malah di embat orang gak bertanggungjawab. Satu hal lagi, kalo pengelolaan kekayaan entu bener (kagak disedot ma swasta asing), pemerinte kagak perlu narik pajak, pajak diambil cuman saat terdesak, itupun diambil hanya dari orang-orang yang layak.

Gak kek sekarang ini, warga nyang disuruh bijak, pemerinte nyang ngacak-acak….beuhhh…bikin Oyen mencak-mencak, AYO..BERTINDAK!!! KITA BISA TANPA PAJAK!!!