Skip to content

Tole Nguambek

03/02/2012
by

Udah lebih 2 minggu eneh Tole nguambek. Oyen gak habis pikir entu anak nguambeknya niru sapa yah, kok aneh begeto. Dan kisah ngambeknya eneh ngulang kisah ngambeknya taon lalo, kalo taon lalu ampe setengah bulan bolos sekul, sekarang uda 2 minggu entu anak ngebolos dan kagak pernah ngerasa salah karena konon katenye nyang ngebiayain sekulah pan emaknye, kagak pake duitnye. Parah!

Taon lalu begeto didatengin ame gurunya dan ditanya kenape kagak sekulah, si Tole ngejawab “Aye udah pindah sekulah”

“Pindah kemane Le?” tanya Buk Gurunye lage

“ke gudang karung belakang rumah” jawab Tole enteng bikin gurunye geleng-geleng.

Dan kale eneh, si Tole pun diinterogasi sama sanak saudara senasib sepenanggungan. Diawali sama Oyen…

“Lo kenape kagak sekulah Le?” tanyak Oyen lemah lembut berasa jadi Tante nyang super baek (kadang.com) wat entu anak

“Seragamnye ilanggg, masak ke sekulah pake seragamnya Tante, kegedean kaleee” Yah Le, gak cuman kegedean tapi juga wagu dan saru… beuhh, masak ponakan ganteng begeto mo pake daster!

Akhirnya Oyen cari dah entu seragam dan ketemu di lobang tikus, ternyata sempet dipinjem ame sitikus kagak bilang-bilang. Tapi setelah seragam buluknye ketemu, tetep aje si Tole masih ngadem di rumah, kagak masuh sekulah

Besoknye giliran si eMbah yang nanyain Tole…

“Kok eLo masih kagak masuk sekulah Le?” tanya si eMbah sambil nggetok kinang

“Kate Tante Oyen, kalo uda seminggu kagak masuk, Tole udah dikeluarin dari sekulah” Jawab si Tole sambil ngitung kutu kupret di ekor si Manis.

Setelah Oyen denger alesan bo’ong si Tole, Oyen minta pihak sekulah wat datengin Tole dan mbilang kalo entu anak masih disisain bangku kosong di kebon belakang. Ee… begeto ditanya ame Buk Guru, si Tole mbilang…

“Ogah ah, Aye sering diancem ame si Boneng di sekulah!” Akhirnya dipanggilah si Boneng dan dikonpirmasi soal Tole, tapi kate si Boneng..

“Butet dah, nyang ada malah Aye nyang diancem Tole, katenye kalo mau temenan ma die musti ngaca dolo getooo, kalo ngerasa ganteng musti nggratisin permen telor cicak ma die” yah, ketauan belangnya dah si Tole..

Dan kusut punyak kusut, ternyate masalahnya atu, entu anak pengen diperhatiin eMaknye, nyang mutusin wat ngekost di deket tempat kerjanye, jadinya pan si Tole kagak ketemu eMaknye saban hari. Maklum, entu anak udah ditinggal kabur ame babenye, nyemplung di kawah pluto kalee…

Dan akhirnya, rapat AD/ART keluarge mutusin bebas tanpa syarat dari kerjaan wat eMaknye, musti ganti kerjaan nyang bisa ngerawat si Tole saban hari. Karena pegimanapun, sekalipun seluruh kampong jengkol udah merhatiin si Tole, tetep aje berasa beda sama eMaknye…

Akhirnya aksi ngambek si Tole berhasil melengserkan eMaknye dari kerjaan.. luar biasa…

*kisah diatas berdasarkan kisah nyata, jikapun ada keanehan disana-sini, biarin dah

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: